.:.الإهداءات.:.

 
 
العودة   منتديات السويد الرسمية > .. الأقســام الأدبيــة .. > دواوين شعراء منتديات السويد حالياً
التسجيل التعليمات قائمة الأعضاء التقويم اجعل كافة الأقسام مقروءة
 

إضافة رد
 
أدوات الموضوع انواع عرض الموضوع
قديم 05-08-2007, 01:39   رقم المشاركة : 1
عضو شرف

 
الصورة الرمزية بيبرس






بيبرس غير متصل


إرسال رسالة عبر مراسل MSN إلى بيبرس

افتراضي هذلول الشويهري 00 ومناخ كحلة 00 وقائع واحداث

هذا الموضوع أعجبني ونقلته من منتديات الطنايا , وهو للكاتب "المرجف" .. وهذه القصة بالنسبة لنا نحن الشباب لانعلم عنها ,أو أننا نسمعها ولانلقي لها بالا ً . ولكني صراحة قرأت الموضوع بتمعن وأحببت أن أنقلها هنا ,ولاأدري هل في هذا المنتدى هذا الموضوع ,ولكني عملت بحثا ً ولم يظهر لي نفس هذا الموضوع..ولنبدأ بالقصة البطولية والمعجزة..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ

بعد ان غزى هذلول الشويهري على الشرارات واخذ حلال منهم ، قام سليم اللحاوي بإرسال راعي ذلول للعواجي يخبره بأن الشويهري غزاهم وهذا ما حصل منه وهذا فعله بنا وهو متجه لكِحْله ويطلب منه أن يكمن له بكحله.
يقول الرّاوي :
تروّحوا الغزو هكالعصر ، قضى الماء اللي معهم وهم يقلّطون الموَرّده
والمورده : يزعجونهم قدامهم عشان يشوفون الماء عليه احد او ما عليه ، ويزيّنون العدّه ويملون الحياض ونطّحونهم ماء .
والمورّدة اللي قلّطوهم قدّامهم عددهم سبعه.
أثاري العواجي عقبهم على كِحله .! ماهو زعج لُه اللحاوي راع الذلول؟
عقاب العواجي جرّد عنزه وكبّر به فهيد بناخيه وقال امسك لهم كحله
ومعهم محمد العواجي بعد ابن عم لهم ، ومعهم عاد ناس واجد.
غزو عنزة يقولون انهم ماادري والله هو عدد او خراص ، يقولون انهم ثلاثميّه وازود ، وهذولاك اللي هم غزو هذلول بس اربعين!
سبعة منهم هاللي قلطواموردة ..
جو العنوز على كحله ونوّخوا ، يوم ورْدو عليه ، ياوالله هذا اثرهم شاربينه ، قال " اكبر وأنا كبير البخت" هذا إثر هذلول وخوياه ، ولا لهم والله إلا هالتّلعه هذي ، نبي نقيم عليه والله مالهم عنه ، كود ينكفّون
ولا يشربون إلا منه ، ترو الغزّاي يرجع مع اثره ، يرجع للماء اللي هو صدّر منه .ولكن امسكوا لهم الماء الياما يجون . وهم يمسكون الما وهم يسقون الجيش ويلوّذونُه بمذراته من شرق والرّقيبه ديام براس الشّذيبه .
ثْمَلَو على كِحله.
هذلول زعج القلوط ، قال : انتم يا هالرّبع هذولا امشو قدّامنا وان لقيتوَه مقطونه ـ كحلة ـ وعليه غزو فالبيانه انّكم تعانقوننا وننحاش ..
جو المورّده ماشافو احد ، وهم يهَوُون عليه مع التلعه، هي بله تلعةٍ لجّ ضِلع!! مع ايمنك جال ومع ايسرك جال وهي بقاع التّلعه. يوم نوّخوا ، مافطنوا إلا يوم تغصوهم الرّجال ، ملبدين لهم مع ايمن التلعه وايسره ، ويمسكونهم ويجيبونهم للعواجي .
العواجي مزيّنن قهوته وجالس وهم يربّطونهم . قال : علّمونا بالصدق . ( قضيب الغزو هكالوقت يقولون الصدق ما يكذبون ويعلّم يالصحيح ) . قالوا : والله حنّا ، طال عمرك ، مورّده للشويهري ، والشويهري هو هذا على ثرنا ، ولا لهم طريقٍ إلا يجونكم . الشبب انهم مظمين ، عطشا ، مالهم حيله ، ولا هناك ماء إلاّ هالمارد . مالهم إلاّ الله ثم كحله . القربه يابسه والذلول تِحِنّ. قال : ( متى حروتهم ؟ ) قالوا : حروتهم العصر . حنا واعدناهم العصر وقلنا إذا ما جيناكم العصر هو بيانة اننا قضِبنا وهم ما يقدرون يجنّبون . قال : ( وش كثرهم؟ ) قالوا : كثرهم ثلاث وثلاثين وتمام الاربعين بنا يا هالسبعه هذولا . قال : ( وش معهم من الفود ؟ ) قالوا : معهم رحل الشرارات وجمل اللحاوي الحرّ ، شعلان، ( له علوم ، ضروب واصيل) .
قال: (( زين )) استعطوا انتم ، اللي له اخو واللي له ولد عم او رجّال يخصّه ، انتم ابشرو انّكم سالمين واللي يخصّكم نبي نسلّمُه . استعطوا انتم على واحد واحد ، على رجّال رجّال ، والباقين نبي نذبحهم .
قال واحد اسمه عمر العميم له اخوين اثنين ( انا والله لي اثنين اخوتي ) قالوا : واحد نبي نذبحه وواحد نبي نخليه ، وش اسمهم ؟ ) . قال : حديهم اسمه دباس والآخر اسمه ركاد . قالوا : ( ايّهم اطيب؟ ) . قال : لا والله إلا دباس اطيب . قالوا : ( ايّهم اللي تبينا نعطيك وايّهم اللي تبينا نذبح؟ ) قال : ابيكم تذبحون دباس وتخلّون ركاد . قالو : ( وراك تطلب الرّدي وتخلي الطيّب يذبح ) . قال : ( الطيّب له وليد وهذاك ما على ثره احد ، ابي اغديه يسْتعقِب . قال : ( عطيناك ركاد وهذاك نبي نذبحه .
وليابهم واحدٍ يقال له رحيّل ابن ضاحي ، ( هامّة يقولون كبر الجمل . قالوا : ( وراك انت ياكبير الزّول ما تستعطي ولا تطلب احد؟ ) قال : والله اني ماخبر لو إذبَح ؟ الرجل اللي يطرد بي مع هالغزو ، ولا لي خاصّه ، كلّهم بعدهم واحد عني.
وهو يصب العواجي هكالفنجال قال : ( هذا فنجال الشويهري ، يامن يشربه وله خمس من ركاب الغزو يتخيّرهن على عينه ، وجب لُه ، والا جمل اللحاوي . هو بالخيار ).
ويا هنا واحدٍ يقال له " رجا البوهي من القراوعه " من قوم العواجي ، رجّال طيّب وعديم وبُه معضد ( يحطّون معاضد بالفرّيس أوّل سنع معضد ، بُه شناشل) . يامار تيحٍ ماهو هيّن . مانا عرض صدروه وعرض جرايد ايديه. قال : (( سق الفنجال جايّ !! انا أشربه )) . قال : تستاهل. وهو يعطيه الفنجال ويشربه ، قال : ( اسمع يالبوهي ، ترى ماهي بسيطه الدّعوى . ترى اللي قدّامك هذلول ) قال : ازهله ، يعين الله عليه.
قال العواجي : انتم يا خويا واحد يصير براس الرّيع من غاد ويراعي للّغف ، مطبّهم ، والباقين يمسكون جوانب هالتّلعه ). المراد انّهم هم صبّطوا بالرّضم ، ملبدين مع ايمن التّلعه وايسره.
هذلول وقومه تَنَوْ ليا ماجا العصر ، ولا جوهم اخوياهم وهم عطشا مستهلكين . وهم بالصيف وعلمهم بالماء امس العصر يوم يغزون على ربع اللحاوي ، قالوا : الرأي راي الله ثم رايك ياهذلول . خويانا وكاد مقضوبين . قال : ( ياجماعه ، القوم لهم شريده والعطش ماله شريده . نموت حنا وفودنا بالخلا ، لكن حنّا نبي نصلق البل عليهم وهالفود اللي معنا نبي نمشي يمّهم ، ولكن مانبي نجيهم إلا مع غيبة الشمس ، ومازول وجهنا يمّهم مايبون يتعرّضونا حتى ناصل الماء . ولياجينا قاعه التلعه ، حوّلوا على ماتطقّون روس الركاب ، قِبَلكم اشربوا بارقابكم ، حتّى تبلّون كبودكم تقوون تهوشون وإزبنوا الضلع.. وهم يجونك يحدون بإثر المورّدة . يوم غابت الشمس ويشوفهم الرّقيبه وهو يجيك يبشّر العواجي ، قال العواجي : اربطوا المورّده وحطوا براس المرسه له اوتاد وطقّوه وخلوهم يجلدون عند القش ، وقال لأخوياه : انتم امسكوا جوانب التلعه ، ولا تعرّضونهم حتى ياصلون القلته ( القلته : ماوراه مخراج ، ضلع ، منتهضه هي بالجبل ولا وراه مخرج ) .
قوم هذلول وهم ناحرين القلته ، يوم وردوا يا خوياهم ماهم بُه ( المورّده) ، وشافوا اثر ميرادهم مع التلعه ، ويوم اقبلوا على القلته ، ياوالله ما يشوفونهم ، ويوم جو قاعه الضلع ، القلته ، وهم لك ينوّخون ، وعلى ماطبّن ركبهن الارض ، وهم قبلهم يتطابقون للقلته يبون يشربون .. وعلى تشريعتهم بالماء ، وهي تركض عليهم العرب . ضبّت عليهم من هنا ومن هنا ، ويسدّون الريع عليهم .!!
يوم ركضوا عليهم ، قال هذلول : هذولا عنزه ! هذا العواجي ، والله ان مسكنا ما يخلّي بنا رطب الحلق !. وخويانا ( المورّده عندهم ) ، مار ربّنوا عماركم .. خوذوا بواريدكم وأزبنوا الجذيبه ، هذي قوم ماله نقى ..
خلوكم بلز الضلع وهوشوا . عماركم أغلى من الفود . قالوا : ركابنا؟
قال : ركابكم هذا قدر لحم ، إتركوهن ! ماجنّكم عقب أهل ، قلّه واليهن واهاليهن . الطّمع بروسكم انتم ، كلٍ ياخذ مزهبته وتورشّعوا الضلع .. ماهم منجشينكم ...
وتِورْشَعُوا الضلع ودلّى هذلول يهوش قفوهم ، ويرجع واحدٍ يقال له : عوض ابن فرّاج ابن خلوي ، يوم انه رجع ناكس للرّكاب ، قال له هذلول وين ياعوض ؟ وين تبي ؟ قال : والله ابقرط رضمتين عند حميرا ( حميرا : ذلوله ، يعني يبي يهوش عنده )!! . قال : ياشين امش لا تثبر السويد .؟ قال : لله ، ياكود يقرط راسي .!!
وبلتفاتة هذلول يوم راعى ، ياوالله ريمه ( ذلوله ) تعتب بإثرهم ، تثور وتروكب ، تثور وتروكب بالصفاة ، الضلع وعر. يوم ارزمت ، حنّت ، تحن ومطيّرة عيونه بهذلول وتعرك كبده على الرضمه بمنحرة . وهو ينتخي هذلول : ارّاخوا سمرا ، شوفوا لون عمل ريمه ! شوفوا لون عمل ريمه !!
أولاد صقر .. ياحق ابوي وجدّي ! وش عذري عند ريمه ؟ ريمة تنخاكم وين اولاد صقر؟ وين زوبع ؟ . قالوا : ياوالله فرحتك وهم يردّون كلّ بمحلّه وهي تخالط بوسط التّلعه ، ويتقامعون هم وأيّاهم ، حضر الشيطان بينهم ، الله يعافينا ويعافيكم من الشرّ !!
السويد قرّنوا ركايبهم ودلّوا يهوشون قفوِهن ، جدّعوا هدومهم وقاموا يهوشون مِلطان مصاليخ !!
البوهي ، اللي شرب فنجال هذلول .. معه الرمح ، ويصوّت : يامن عيّن هذلول يالغانمين؟ قال هذلول : حاضر وانا اخو سمرا . وهو لك ينهض الرّمح "البوهي" مطلع يده من الرمح من جهه ومعضده طالع من الجهه الاخرى ،
وقال : اللي يبي ريمه مايخلّيها قفوه وهي هذا عمله ، وهو واقف عنده.
قال هذلول : لا والله ما اخليّه ، خيّال الرّحمان وأنا خو سمرا .!
هذلول معه شلفا قصيره وهذاك معه رمح طويله ؛ وهم يتقاوسون الرماح كل واحد يقوس واحد ومن بينهم لهم رضمة وش كبره ، ماواحد ينول واحد ..
قال :اطلع واطلع !! وهو يحترف عليه ، يبي واحد يذوّد على واحد. يامار حسين مع ايمنهم ومولّم باروده .! ورجا البوهي مولّم رمحه يبي يضرب هذلول ، وهذلول بالمثل مشطّر يده .! وهو يحطّه حسين بشعرات الابط ، وهي تثور ، يوم ثارت يامار ناثرن ريته على الصّفاه ، وعلى ماوقع ليا هذلول عنده وهو يردعه . وياخذ الرمح منه ويعطيه حدا السويد يهوش به...
وهو يفوع على هذلول ، فهيد ، عقيد غزو العواجي ، من قرّيب ، لياحسين (من بوارديّه هذلول) مظهر المدل ، يوم راعي .. يامار الرجل وارد على هذلول .! وهو يمسّه حسين ، يوم مسّه ..ياملجلمده وهو يقع على رجا البوهي ...
على ما وقع فهيد ، ياحطّة عبدالله ابن سعدون المقط بالزناد وضرب الملح بالمدك ، يامار محمد العواجي مقبل على هذلول بعد ، وهو قريب له يوم شاف فهيد وقع ، يامار مايمدي ابن سعدون يطلع المدك ، شاف الرجال واصل هذلول واعجله انت يالعواجي لا يطلع المدك .! ومدكّه وملحه وكيشه وقرميشه وهو يثوّر به. وهو يضربه المدك مع الدّيد ، يامار شاعطن جنبه وطالع مع ابطه واختلف الرجال وقعد يموح ، يامار الدّم من ايمنه وايسره .
ويدلّي يقطع الجموع ، يوم شافوه قومه ( عنزه) وهم ينكسرون...
هالحين اظلموا . وجاهم الليل ، قال ابن ضاحي ( رحيّل اللي ما ستعطى من اللي مربّطين عند القش ) : ياجماعه ! يقصد اخوياه المربّطين عنده ، الله وأعلم ان عنزه انكسروا . قالو : وش يدريك ؟ ، قال : يدرينن حس هذلول هو هذا قرّب .! ماهو بمحلّه مشوين .! أوّل يالله اسمعه والحين قرّب ، هذا هو وصلنا . لكن اسمعوا ارتكوا على المِرِسه حدِر ، كلّكم يالستّه ، وأنا ابرتع به أغديه تنقطع ( بلاياة هو الله يرحمه) .! وهم لك يرتكون على المرسه كلّهم حدر وهو يرثع به وهي تنقطع ، وهم لك كلّ ياخذ سلاحه ويجونك ورى اركاب العنوز ، يتظهّرونهم، من شنقهم من غاد ، وليا هذي هي منكسره ، وهم ينسفونهم شنق الركاب وياخذونهن ، وليا هذلول وربعهم مع تاليهم؛. وهم يتصاوتون (طابيه.. طابيه ) ويصيحون عليهم السويد صيحة محمد على الكفّار!! وتزين ويزيّنه الله .
يوم انّهم اجتمعوا ويتفقّدون خوياهم ، ويفقدون لهم واحدٍ يقال له عمر ابن نوفل ، سويدي ، من الهرابده ، وهم يرجعون للمغارة ويلقونه مصوّب مع فخذه ، مكسوره فخذه ، وهم يشيلونه ويجيبونه لمغارة هذلول ، قالوا حنا نبي نجلس بهذا ، ودلّوا المورّده يقصّون عليهم قصّتهم بالنّهار، وقالوا نبي نجلس بهذا لما نصبح ونبيكم تشوفون المذبوحين ، غدينا نتعرف على العقيد واللي شرب الفنجال ، يوم انّهم اصبحوا ، وليا هذا فهيد العواجي ، مثوّر به ومضروب بالسيف مع ظهره بس انه مامات !! وليا هذا محمد العواجي ضاربته مع الديد ، اللي ثؤّر به عبدالله ابن سعدون، سويدي ، من ربع حسن ابن سعدون راعي الصنينا ، وليا هذا البوهي اللي شرب الفنجال واقع وميت شمام ، ويقول هذلول لفهيد العواجي :الرجال كل يوم بيدي الرجال وأنت حطّك الله بايدينا وإسمك اللي انعثرت ! وحنا نبي نتجمّل بك ، أنت تبينا نشيلك ونحطّك عند اطرف بيت عنزي ونخلّيك!! ولاّ تبي نروح بك معنا يم اهلنا وان حييت وجهك على هلك وإن مت وجهك على الله !!؟
قال : والله انا يوم عملتوا بي هاللون ، مانتم متجمّلين بي بعد ، يبون يجون الجعافره ، ماهم مخلّيني ، يبون يزورون محلّي هان !!
قال هكالواحد : هالحين حنا نبي نتجمل بك وتوعّدنا وانت على حفرة الموت !؟ هاتس ايّاه ياضبعه الخشيم تجمّلي به ، وهو يقطف راسه ويقرطه !!؟
وخوذوا ركاب العنوز مع رحل الشرارات < عفية والله بني عمي:)
المهم .. ان هذلول والغزو اللي معه اسقوا هالحين وتنومسوا ، خذوا ركاب العنوز مع رحل الشرارات ، قشّوه كلّه ووصّلوه لاهلهم ...

وقال حسين الذنيب :-


[poem=font="Arial,5,#00008b,normal,normal" bkcolor="" bkimage="" border="none,1," type=0 line=0 align=center use=ex num="0,"]
يالله ياللـي فـوق خلقـك ضمينـا=عليـم مايخفـى علـى الله خافـي
نلوذ بـك وانـت الـذي تحتمينـا=يامنطي الجزلات والـرّزق وافـي
ركض بهم ولـد العواجـي علينـا=من الزود ماجنّب طريق المهافـي
باقرانـهـن ياشـيـخ لا تبتليـنـا=وش عذرنا من قاطعـات الفيافـي
ياما على ركـن الركايـب حدينـا=وضرب بعيدان القنـا وانعجافـي
يثـور مـن تفّاقـهـم كالحنيـنـا=ويثور مـن تفّاقنـا ملـح صافـي
مطـارقٍ يقذفـن مثـل الشّننيـنـا=ياما وقع بخشومهـن مـن سنافـي
وحامـن طيـور مدبحـات علينـا=من بيننا يرجن غصيـب العلافـي
دونك رجا فـي ملعـب الغانمينـا=عقب الوجب تذرى عليه السوافـي
هذا جزا اللي مـن شمـام يجينـا=يبي الجمل ولا الرّكايـب جزافـي
ومحمد يسرى الحمـر مـن يمينـا=واستقرعه ستـر البنـيّ العفافـي
فهيـد وقـع بالجـرّ يالذاهبيـنـا=ماخـوذ ياركـب تـروّح خفافـي
يامـا رجمناهـم بحـدّ البطيـنـا=بمشنشلات مـع سيـوف رهافـي
هـذي مـن الله عــادةٍ ليابليـنـا=نجـدع لحثّـات البراثـن علافـي
وابو غلولٍ شوق مـوض الجبينـا=عقيدنا مـا ينطـي الخيـل قافـي
ليـا انتخـى هذلـول ثـم انتخينـا=لعيـون ربـع قرّنـوا بالكتـافـي
ملطـان ماتلقـى المشالـح علينـا=عـذالـةٍ يالابسـيـن الكفـافـي
نقلت انـا سمـران ربعـي علينـا=وخطو اشقح الصّبيان جاوه الهرافي
وركابـنـا مافوقـهـن الذّهيـنـا=وعقيدنـا ماينطـي الخيـل قافـي
اركض بنا يابـو غلـول رصينـا=تجعـل عمـار طايـلاتٍ قصافـي[/poem]

---وانتهى مغزى كِحله----
منقول







رد مع اقتباس
قديم 05-08-2007, 12:40   رقم المشاركة : 2
مشرف و عضو اللجنة الإعلامية
 
الصورة الرمزية المسعودي





المسعودي غير متصل


اوسمتي


إرسال رسالة عبر مراسل AIM إلى المسعودي

افتراضي

لك مني جزيل الشكر
على النقل الرائع
ورحم الله اموات المسلمين

تحياتي







رد مع اقتباس
قديم 05-08-2007, 02:32   رقم المشاركة : 3
مراقب عام
 
الصورة الرمزية طارق السويدي





طارق السويدي غير متصل


اوسمتي


افتراضي

بيبرس

الف شكر لك على النقل الرائع

وفقك الله اخي الغالي







رد مع اقتباس
قديم 06-08-2007, 01:28   رقم المشاركة : 4
عضو شرف

 
الصورة الرمزية بيبرس






بيبرس غير متصل


إرسال رسالة عبر مراسل MSN إلى بيبرس

افتراضي

إخواني : المسعودي ,, طارق .. بارك الله فيكما ووفقمكا لكل خير..







رد مع اقتباس
قديم 06-08-2007, 12:12   رقم المشاركة : 5
عضو شرف

 
الصورة الرمزية بيرق






بيرق غير متصل


افتراضي




بيبرس

الف شكر لك على النقل الرائع

وفقك الله اخي الغالي







التوقيع :

رد مع اقتباس
قديم 07-08-2007, 01:30   رقم المشاركة : 6
عضو شرف

 
الصورة الرمزية بيبرس






بيبرس غير متصل


إرسال رسالة عبر مراسل MSN إلى بيبرس

افتراضي

أخي البيرق ..تراث الأجداد نفتخر به ونعتز بتعلمه ونشره ..
بـــــــــــــارك الله فيك..







رد مع اقتباس
قديم 07-08-2007, 02:45   رقم المشاركة : 7
عضو شرف واداري سابق
 
الصورة الرمزية مطلب الخاتم






مطلب الخاتم غير متصل


افتراضي

الف شكر على الاهتمام

وسيره هذلول الشويهري ومن ضمنها هذه المعركه موجوده بمنتدى تاريخ السويد والدواوين







التوقيع :

رد مع اقتباس
قديم 07-08-2007, 05:43   رقم المشاركة : 8
عضو متميز





القليبي غير متصل


افتراضي

الموضوع مكرر لذا وجب نقله







التوقيع :
[poem font="Traditional Arabic,4,#2e8b57,bold,normal" bkcolor="" bkimage="" border="solid,4,#ff0000" type=0 line=1 align=center use=sp num="0,"]
ياحمود انا ماشفت منهم ممله=وكلامهم ماعاد يظهر على الجار
وإلا أحد قربه على الكبد عله= مسوي جماله لو يجدد لك الدار [/poem]

رد مع اقتباس
قديم 23-01-2010, 04:27   رقم المشاركة : 9
مراقب عام
 
الصورة الرمزية ابو فهد





ابو فهد غير متصل


اوسمتي


افتراضي

الله يذكرك بالخير يابيبرس







التوقيع :
[a7la1=#26cc26]
اللهم ارحمنا برحمتك

[/a7la1]

رد مع اقتباس
قديم 23-05-2014, 05:35   رقم المشاركة : 10
عـضـو ذهـبـي
 
الصورة الرمزية أبوممدوح





أبوممدوح غير متصل


اوسمتي


افتراضي

الله يرحم الجميع
الشاعر/ رشيد ابن طوعان
وصاحب المنخات الشويميه/رشيد ابن بشير
ساري الليل
مشكور على نقل
القصة القصيده






التوقيع :



رد مع اقتباس
إضافة رد

العلامات المرجعية

« الموضوع السابق | الموضوع التالي »

يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
قصيده رشيد يرثى العقيدالفارس هذلول الشويهري القليبي ديوان الشاعر رشيد بن طوعان 23 10-08-2014 07:31
حفل زواج أبناء هذلول الشويهري ابن بزيع منتدى الأفراح والمناسبات 29 23-04-2011 10:22


جميع الأوقات بتوقيت GMT +3. الساعة الآن 02:49.
أرشفه ودعم وتطوير استضافة تعاون


Powered by vBulletin® Version 3.8.6
Copyright ©2000 - 2020, vBulletin Solutions, Inc.
جميع المشاركات المكتوبة تعبّر عن وجهة نظر صاحبها ...... ولا تعبّر بأي شكل من الأشكال عن وجهة نظر مـنـتـديات الـسـويــد الرسمية
  تصميم الويب سايت